ఢిల్లీ: మత మార్పిడి మరియు రిజర్వేషన్ల అంశంపై సుప్రీంకోర్టు నేడు ఒక చారిత్రాత్మక తీర్పును వెలువరించింది. షెడ్యూల్డ్ కులాలకు (SC) చెందిన వ్యక్తులు క్రైస్తవ మతంలోకి మారినట్లయితే, వారు తమ ఎస్సీ హోదాను తక్షణమే కోల్పోతారని అత్యున్నత న్యాయస్థానం స్పష్టం చేసింది. హిందూ, సిక్కు లేదా బౌద్ధ మతాలను అనుసరించేవారు మాత్రమే ఎస్సీ హోదాకు అర్హులని కోర్టు పునరుద్ఘాటించింది.
కేసు నేపథ్యం:
ఆంధ్రప్రదేశ్ రాష్ట్రానికి చెందిన చింతాడ ఆనంద్ అనే పాస్టర్ దాఖలు చేసిన పిటిషన్పై విచారణ సందర్భంగా జస్టిస్ ప్రశాంత్ కుమార్ మిశ్రా, జస్టిస్ ఎన్.వి. అంజారియాలతో కూడిన ధర్మాసనం ఈ తీర్పునిచ్చింది. గుంటూరు జిల్లాకు చెందిన ఆనంద్, తాను దళితుడినని, తనపై జరిగిన దాడిపై ఎస్సీ, ఎస్టీ అత్యాచార నిరోధక చట్టం (Atrocity Act) కింద కేసు నమోదు చేయాలని కోరారు. అయితే, ఆయన గత పదేళ్లుగా క్రైస్తవ మతంలో పాస్టర్గా కొనసాగుతున్నందున, ఆయనకు ఎస్సీ హోదా వర్తించదని గతంలో ఆంధ్రప్రదేశ్ హైకోర్టు తీర్పునిచ్చింది. ఈ తీర్పును సవాల్ చేస్తూ ఆనంద్ సుప్రీంకోర్టును ఆశ్రయించారు.
తీర్పులోని ముఖ్యాంశాలు:
- మతం మారితే హోదా ఉండదు: రాజ్యాంగ (షెడ్యూల్డ్ కులాలు) ఉత్తర్వు, 1950 ప్రకారం.. హిందూ, సిక్కు, బౌద్ధ మతాలు కాకుండా ఇతర మతాల్లోకి మారిన వ్యక్తిని ఎస్సీగా పరిగణించలేరు.
- క్రైస్తవంలో కుల వ్యవస్థ లేదు: క్రైస్తవ మతం కుల వ్యవస్థను గుర్తించదు. కాబట్టి, ఆ మతంలోకి మారిన తర్వాత సామాజిక వివక్ష పేరుతో ‘ఎస్సీ, ఎస్టీ అట్రాసిటీ చట్టం’ కింద రక్షణ పొందడం సాధ్యం కాదు.
- కుల సర్టిఫికెట్ ఉన్నా చెల్లదు: ఒక వ్యక్తి మతం మారిన తర్వాత కూడా పాత ఎస్సీ సర్టిఫికెట్ను కలిగి ఉన్నప్పటికీ, దాని ఆధారంగా ఎలాంటి రాజ్యాంగపరమైన ప్రయోజనాలు లేదా రిజర్వేషన్లు పొందలేరు.
- నిబంధన కఠినం: 1950 నాటి రాజ్యాంగ ఉత్తర్వులోని క్లాజ్ 3 ప్రకారం ఈ నిబంధన చాలా స్పష్టంగా ఉందని, ఇందులో ఎటువంటి మినహాయింపులకు తావులేదని ధర్మాసనం పేర్కొంది.
సామాజిక ప్రభావం:
ఈ తీర్పు దేశవ్యాప్తంగా ఉన్న దళిత క్రైస్తవులపై తీవ్ర ప్రభావం చూపే అవకాశం ఉంది. క్రైస్తవంలోకి మారినప్పటికీ తమకు ఎస్సీ హోదా కొనసాగించాలని దళిత క్రైస్తవ సంఘాలు దశాబ్దాలుగా చేస్తున్న పోరాటానికి ఇది ఒక పెద్ద ఎదురుదెబ్బగా భావిస్తున్నారు. మరోవైపు, ఈ తీర్పు రాజ్యాంగబద్ధమైన నిబంధనలను మరింత బలోపేతం చేస్తుందని న్యాయ నిపుణులు అభిప్రాయపడుతున్నారు. ఈ తీర్పుతో ఇక పై అట్రాసిటీ అక్రమ కేసులకు కల్లెం వేసినట్లైయింది. అంతే కాకుండా అట్రాసిటీ కేసులలో బాదితుడికి చెల్లించే పరిహారం కూడా రికవరీ చేస్తేనే ఇకపై చట్టం దుర్వినియోగం కాకుండా ఉంటుంది.