ముంబై, సెప్టెంబర్ 22: IIT బాంబేలో రెండో సంవత్సరం B.Tech విద్యార్థి సహిల్ వాకోడే మృతి ఘటనపై దర్యాప్తు కొనసాగుతోంది. సెప్టెంబర్ 18న క్యాంపస్లోని హాస్టల్ గదిలో సహిల్ మృతిచెందిన ఘటన అనంతరం విద్యార్థుల ఆందోళనలు, పోలీసు దర్యాప్తు, సంస్థాగత చర్యలు కొనసాగుతున్నాయి. తాజా సమాచారం ప్రకారం, పరీక్షా హాల్కు సంబంధించిన సీసీటీవీ ఫుటేజీ పోలీసుల దర్యాప్తులో కీలకంగా మారింది. ఈ కేసును ముంబై క్రైమ్ బ్రాంచ్ దర్యాప్తు చేస్తోంది. సోమవారం అధికారులు సహిల్ హాస్టల్ గదిని తనిఖీ చేసి పంచనామా నిర్వహించారు. ఇప్పటివరకు ఎలాంటి సూసైడ్ నోట్ లభించలేదని పోలీసులు తెలిపారు. కేసుకు సంబంధించిన పత్రాలు, సీసీటీవీ ఫుటేజీ తదితర ఆధారాలను అధికారులు సేకరిస్తున్నారు.
సహిల్ కుటుంబం చేసిన ఫిర్యాదు ఆధారంగా ప్రొఫెసర్ సూర్యనారాయణ దూల్లా పేరును ఎఫ్ఐఆర్లో చేర్చారు. ఆయనపై ఆత్మహత్యకు ప్రేరేపించినట్లు ఆరోపణలతో పాటు SC/ST (Prevention of Atrocities) Act కింద కేసు నమోదు చేస్తున్నట్లు అధికారులు వెల్లడించారు .IIT బాంబే సోమవారం దూల్లాను డీన్ (Administrative Affairs) పదవి నుంచి తొలగించింది/డీన్షిప్ను తక్షణమే నిలిపివేసింది. అయితే ఆయన ప్రొఫెసర్గా సంస్థలో కొనసాగుతున్నారని IIT బాంబే మరియు ఫ్యాకల్టీ ఫోరం తెలిపింది.
సహిల్ మృతికి ముందు జరిగిన పరిణామాలపై దర్యాప్తు పూర్తికాకముందే వివరాలను వెల్లడించడం సరికాదని IIT బాంబే సోమవారం పేర్కొంది. గత ప్రకటనలో చేసిన వ్యాఖ్యలకు సంస్థ క్షమాపణలు తెలిపింది. తొలి ప్రకటనలో పరీక్ష సమయంలో సహిల్ మొబైల్ ఫోన్ ఉపయోగించి ChatGPT ద్వారా ప్రశ్నపత్రానికి సమాధానాలు పొందేందుకు ప్రయత్నించాడని సంస్థ పేర్కొంది. అయితే, అనంతరం దర్యాప్తు కొనసాగుతున్న నేపథ్యంలో ఈ సంఘటనకు సంబంధించిన వివరాలను ముందుగానే నిర్ధారిత విషయాలుగా పేర్కొనడం తగదని సంస్థ స్పష్టం చేసింది.
సహిల్ కుటుంబ సభ్యులు అతనిపై కుల వివక్ష, వేధింపులు జరిగినట్లు పోలీసులకు ఫిర్యాదు చేశారు. ఈ ఆరోపణలను IIT బాంబే తిరస్కరించింది. సహిల్ నుంచి తమ SC-ST సెల్ లేదా పరిపాలనకు అలాంటి ఫిర్యాదు ఏది అందలేదని సంస్థ తెలిపింది. ఈ ఆరోపణలపై దర్యాప్తు అధికారులు ఆధారాలను పరిశీలిస్తున్నారు. ఘటన అనంతరం IIT బాంబే క్యాంపస్లో విద్యార్థులు నిరసనలు చేపట్టారు. స్వతంత్ర దర్యాప్తు, విద్యార్థుల సంక్షేమం, క్రమశిక్షణా ప్రక్రియల్లో మార్పులు, మానసిక ఆరోగ్య సహాయాన్ని బలోపేతం చేయడం వంటి పలు 18 అంశాలతో కూడిన డిమాండ్లను విద్యార్థులు విద్యా సంస్థ ముందుంచారు.
ఇదిలా ఉండగా, ప్రొఫెసర్ దూల్లాకు మద్దతుగా IIT బాంబే ఫ్యాకల్టీ సభ్యులు మార్చ్ నిర్వహించారు. దూల్లా పరీక్ష సమయంలో సంస్థ ఆమోదించిన విధానాల ప్రకారమే వ్యవహరించారని ఫ్యాకల్టీ ఫోరం పేర్కొంది. ప్రస్తుతం సహిల్ వాకోడే మృతికి దారితీసిన పూర్తి పరిస్థితులపై పోలీసు దర్యాప్తు కొనసాగుతోంది. పరీక్షా హాల్ సీసీటీవీ ఫుటేజీ, హాస్టల్కు సంబంధించిన ఆధారాలు, కుటుంబం చేసిన ఆరోపణలు, సంస్థ వివరణలు తదితర అంశాలను దర్యాప్తు అధికారులు పరిశీలిస్తున్నారు. దర్యాప్తు పూర్తయ్యే వరకు మృతికి ఖచ్చితమైన కారణం లేదా ఏ వ్యక్తి బాధ్యతపై తుది నిర్ణయానికి రావడం తొందరపాటు చర్య అవుతుంది అని దర్యాప్తు అధికారులు తెలియజేశారు.