నెల్లూరు: రాష్ట్రంలోని మున్సిపాలిటీల్లో కూటమి ప్రభుత్వం పెద్ద ఎత్తున అవినీతికి పాల్పడుతోందని వైఎస్సార్ కాంగ్రెస్ పార్టీ నాయకులు మండిపడ్డారు. రాష్ట్రవ్యాప్తంగా ఉన్న 123 మున్సిపాలిటీలలో రూ. 1200 కోట్ల చెత్త దోపిడీ జరిగిందని, దీనికి మున్సిపల్ శాఖ మంత్రి నారాయణే పూర్తి బాధ్యత వహించాలని డిమాండ్ చేశారు. ఈ అవినీతిని నిరసిస్తూ నెల్లూరులోని వీఆర్సీ సెంటర్ వద్ద వైఎస్సార్సీపీ జిల్లా అధ్యక్షులు కాకాణి గోవర్ధన్ రెడ్డి, నెల్లూరు సిటీ నియోజకవర్గ ఇన్చార్జ్, ఎమ్మెల్సీ పర్వత రెడ్డి చంద్రశేఖర్ రెడ్డి ఆధ్వర్యంలో పార్టీ నాయకులు, కార్యకర్తలు భారీ నిరసన కార్యక్రమం చేపట్టారు.
ఈ సందర్భంగా వైఎస్సార్సీపీ శ్రేణులు ప్లకార్డులు ప్రదర్శిస్తూ, కూటమి ప్రభుత్వానికి మరియు మంత్రి నారాయణకు వ్యతిరేకంగా పెద్ద పెట్టున నినాదాలు చేశారు. ఈ అవినీతిపై మంత్రి నారాయణ బహిరంగ చర్చకు రావాలని వైఎస్సార్సీపీ నేతలు సవాల్ విసిరారు.
ప్రజాధనం విచ్చలవిడిగా దోపిడీ: కాకాణి గోవర్ధన్ రెడ్డి
మాజీ మంత్రి కాకాణి గోవర్ధన్ రెడ్డి మాట్లాడుతూ, చెత్త సేకరణ పేరుతో పేద ప్రజల నుంచి బలవంతంగా పన్నులు వసూలు చేసి, ఆ సొమ్మును అడ్డగోలుగా దోచుకుంటున్నారని ఆగ్రహం వ్యక్తం చేశారు. రూ. 1200 కోట్ల అవినీతికి సంబంధించిన అన్ని ఆధారాలను వైఎస్సార్సీపీ బయటపెట్టినప్పటికీ, మంత్రి నారాయణకు చీమకుట్టినట్లయినా లేదని ఎద్దేవా చేశారు. ప్రతిపక్షాలు అడుగుతున్న ప్రశ్నలకు సమాధానం చెప్పలేక మంత్రి తప్పించుకు తిరుగుతున్నారని, ప్రెస్ మీట్లలో కాకుండా బహిరంగ చర్చకు వచ్చి నిజానిజాలు నిగ్గుతేల్చాలని డిమాండ్ చేశారు.
మంత్రి నారాయణ అవినీతి చిట్టా ఇదే: ఎమ్మెల్సీ పర్వత రెడ్డి చంద్రశేఖర్ రెడ్డి
ఎమ్మెల్సీ పర్వత రెడ్డి చంద్రశేఖర్ రెడ్డి మాట్లాడుతూ కూటమి ప్రభుత్వంపై తీవ్రస్థాయిలో విరుచుకుపడ్డారు. మంత్రి నారాయణకు సంబంధించిన బినామీలకు లబ్ధి చేకూర్చేందుకే ఈ దోపిడీ జరుగుతోందని ఆరోపిస్తూ పలు అంశాలను ప్రస్తావించారు:
- చెత్త, వాహనాల కాంట్రాక్టులు: గతంలో ఉన్న క్లాప్ (CLAP) ఆటోలను పక్కనపెట్టి, మంత్రి బినామీల కోసమే ట్రాక్టర్లను తీసుకొచ్చారని ఆరోపించారు. కంపాక్టర్లు, స్వీపింగ్ మిషన్ల కొనుగోలులో భారీగా అక్రమాలు జరిగాయని, బయటి వారు టెండర్లలో పాల్గొనకుండా చేసి అన్ని కాంట్రాక్టులను ఒకే వ్యక్తికి కట్టబెట్టారని మండిపడ్డారు.
- వీఆర్ఐ హైస్కూల్ నిధులు: గతంలో వీఆర్ఐ హైస్కూల్ అభివృద్ధి పేరుతో రూ. 10 కోట్ల దోపిడీకి అంచనాలు రూపొందించింది వాస్తవం కాదా అని ప్రశ్నించారు.
- చెట్ల పెంపకంలో స్కెచ్: పట్టణాల్లో నాటే ఒక్కొక్క చెట్టుకు రూ. 12 వేల చొప్పున దోచుకోవడానికి స్కెచ్ వేశారని, వైఎస్సార్సీపీ దీనిపై ప్రశ్నించడంతోనే వెనక్కి తగ్గారని పేర్కొన్నారు.
- జాఫర్ సాహెబ్ కెనాల్ నిధులు: జాఫర్ సాహెబ్ కెనాల్ వద్ద స్ట్రీట్ వెండింగ్ ప్రాజెక్ట్ పేరుతో మంత్రికి సంబంధించిన వారు బంకులు పెట్టుకునేందుకు కార్పొరేషన్ జనరల్ ఫండ్స్ నుండి రూ. 8 కోట్లు డ్రా చేశారని ఆరోపించారు.
- రోడ్ల ధ్వంసం – నిధుల దుర్వినియోగం: ఒకపక్క కోట్ల రూపాయలు ఖర్చు పెట్టి రోడ్లు వేస్తూనే, మరోపక్క ఎండ్-టు-ఎండ్ రోడ్లని, యూజీడీ పేరుతో అవే రోడ్లను పగలగొడుతూ ప్రజాధనాన్ని విచ్చలవిడిగా దుర్వినియోగం చేస్తున్నారని ధ్వజమెత్తారు.
కలెక్టరేట్ ముట్టడికి పిలుపు
ఇంటి పట్టాల పంపిణీ విషయంలోనూ కూటమి ప్రభుత్వం అవాస్తవాలు ప్రచారం చేస్తోందని, గత వైఎస్సార్సీపీ ప్రభుత్వం ఇచ్చిన పట్టాలపై కూడా చర్చకు తాము సిద్ధమని ఎమ్మెల్సీ స్పష్టం చేశారు. తాము అభివృద్ధికి ఎన్నడూ అడ్డుపడబోమని, అయితే అభివృద్ధి మాటున జరిగే అవినీతిని సహించే ప్రసక్తే లేదన్నారు. ఒక్క నెల్లూరులోనే కాకుండా రాష్ట్రంలోని 123 మున్సిపాలిటీల్లో జరిగిన చెత్త దోపిడీపై త్వరలోనే కార్పొరేషన్ కార్యాలయం, కలెక్టరేట్ ముట్టడి కార్యక్రమాలను చేపడతామని వైఎస్సార్సీపీ నేతలు హెచ్చరించారు. ఈ నిరసన కార్యక్రమంలో వైఎస్సార్ కాంగ్రెస్ పార్టీ నాయకులు, కార్యకర్తలు మరియు ప్రజలు పెద్ద సంఖ్యలో పాల్గొన్నారు. కానీ జిల్లాలో ఉన్న ఇతర వైకాపా నేతలు ఈ నిరసనలలో పాల్గొనక పోవడంతో పార్టీ లోనే రుసరుసలు వినిపిస్తున్నాయి.